“Qanun” Nəşrlər Evindən oğurluq olub
Sentyabrın 27-si gecə “Qanun” Nəşrlər Evindən oğurluq olub, 3 min manatdan çox pul aparılıb.
“Qanun”un rəhbəri Şahbaz Xuduoğlu Turan-a bildirib ki, faktla bağlı Nəsimi Rayon Polis İdarəsində cinayət işi başlanıb.
Şahbaz Xuduoğlunun sözlərinə görə, “Qanun” Nəşrlər Evinin yerləşdiyi binanın əsas qapısı açılıb, mühasibatlığın qıfılı sındırılıb, dolablar ələk-vələk edilib: “Ən üst mərtəbənin banından tavan dağıdılıb, “Əli və Nino” nəşriyyatının kitablarının saxlandığı anbarda seyf yarılıb. Başqa bir otağın əşyaları dağıdılıb. Daha bir qapıya ling salınıb. Bir sözlə, nəşriyyatın binasını gecə uzunu yaxşıca yağmalayıblar.
İşçilər gəldilər, polis çağırdıq, bəlli oldu ki, bizim kassadan 3 min manatdan çox pul aparılıb, “Əli və Nino”dan isə 213 manat 20 qəpik. Kameralara baxdıq, iki maskalı şəxsin görüntüsü var idi. Tarixə baxdıq – 27 sentyabr. Düz bir il əvvəl eyni gündə oxşar hadisə baş vermişdi. O zaman törədilən oğurluqla əlaqədar başlanmış cinayət işi sanki bir futbol topu kimi prokurorluqla polis arasında atılıb-tutuldu, sıxıldı, əzildi və günlərin bir günü havaya uçdu, yox oldu. Nə prokurorluqdan bir xəbər gəldi, nə polisdən.
Biz ümidimizi itirməmişik. Bu dəfə də polisə sığındıq. Amma keçən il eyni vaxtda baş verən oğurluğun üstü açılsaydı, bu gün bu hadisə baş verməzdi. Guya “Qanun” Nəşrlər Evinin binasına partlayıcı qoyulduğu barədə hüquq mühafizə orqanlarına məlumat daxil olması adıyla nəşriyyatımızda axtarış aparılmasaydı, qondarma ittihamla 150 min manat vergi cəriməsinə məruz qalmasaydıq, gömrükdə kitablarımız həbsə alınmasaydı, bir sözlə, qanun işləsəydi, hüququn aliliyi qorunsaydı, bu gün öyrəncəli oğruların asan gəlir mənbəyinə çevrilməzdik”.
