Qadını geyiminə görə döyən kişiyə ittiham elan olunub
Türkiyənin İstanbul şəhərində avtobusda qadını geyiminə görə döyən şəxslə bağlı ittiham aktı elan olunub.
Novator.az-ın məlumatına görə, İstanbul prokurorluğunun irəli sürdüyü ittihamnamədə qadını döyən 35 yaşlı Abdulla Çakıroğlu fikir azadlığına dözümsüzlük nümayiş etdirməkdə və vətəndaş hüququnu pozmaqda təqsirli bilinir. İttiham aktındakı maddələrlə Çakıroğlu 2 il 7 aydan 9 il 4 ayadək həbs edilə bilər.
Bu il sentyabrın 12-də Abdulla Çakıroğlu şort geydiyinə görə avtobusda 23 yaşlı qadının üzünə zərbə endirib. O, hüquq mühafizə orqanlarına ifadəsində xarici görünüşü xoşuna gəlməyən adamları döydüyünü deyib: “Dövlət bu cür geyinənləri cəzalandırmalıdır”.
Hadisəni törətdikdən sonra hüquq mühafizə orqanları Abdulla Çakıroğlunu tutmuş, amma sonradan buraxmışdı. Onun buraxılması sosial şəbəkələrdə etiraz kampaniyasına səbəb olmuşdu.
