Sərkisyan yeni nazirlər təyin etdi
Ermənistan prezidenti Serj Sərkisyan sentyabrın 27-də nazir təyinatları ilə bağlı sərəncamlar imzalayıb. Novator.az-ın məlumatına görə, Arpine Ovannisyan ədliyyə naziri, Armen Yeritsyan fövqəladə hallar naziri, Artyom Asatryan əmək və sosial məsələlər naziri, Qranuş Akopyan diaspor naziri, David Lokyan ərazi idarəçiliyi və inkişaf naziri, Levon Mkrtçyan elm və təhsil naziri postlarında qalıblar.
Əvvəlki hökumətdə iqtisadiyyat naziri postunu tutan Arsvik Minasyan təbiəti mühafizə naziri təyin edilib.
Dövlət başçısı hökumətə yeni şəxslər də gətirib. Armen Əmiryan mədəniyyət naziri, Qraçya Rostomyan gənclər və idman naziri, Levon Altunyan səhiyyə naziri, Suren Karayan iqtisadiyyat naziri postuna təyinat alıb.
Sentyabrın 13-dən Ermənistan hökumətinə Karen Karapetyan baş nazirlik edir. Əvvəl baş nazir postunu Ovik Abramyan tuturdu. Baş nazir dəyişdiyi üçün Ermənistan hökuməti yenilənir. Yeni hökumətin tərkibi ilə bağlı ilk sərəncamlar sentyabrın 20-də imzalanıb. Vaçe Qabrielyan baş nazirin müavini, beynəlxalq iqtisadi inteqrasiya və islahatlar naziri postuna təyinat alıb. Hökumət Aparatının rəhbəri – nazir vəzifəsi David Arutyunyana tapşırılıb.
Maliyyə naziri vəzifəsinə Vardan Aramyan, nəqliyyat və rabitə naziri vəzifəsinə Vahan Martirosyan, kənd təsərrüfatı naziri postuna İqnati Arakelyan, enerji və təbii sərvətlər naziri vəzifəsinə Aşot Manukyan təyin edilib. Bu nazirlər hökumətdə yeni şəxslərdir.
Sentyabrın 27-də Ermənistan parlamenti hökumətdə struktur dəyişiklikləri layihəsini ilk oxunuşda qəbul edib. Hökumətin təqdim etdiyi layihədə İqtisadiyyat Nazirliyinin İnvestisiya və Sahibkarlığa Dəstək Nazirliyinə, Enerji və Təbii Sərvətlər Nazirliyinin Enerji İnfrastrukturu və Sərvətlər Nazirliyinə çevrilməsi nəzərdə tutulur.
Digər yenilik Nəqliyyat və Rabitə Nazirliyinin bazasında Nəqliyyat, Rabitə və İnformasiya Texnologiyaları Nazirliyi yaradılmasıdır. Şəhərsalma Nazirliyi isə komitəyə çevrilir.
