Qırğızıstanda referendum dekabrın 4-də keçirilə bilər
Qırğızıstanda konstitusiya referendumu dekabrın 4-də keçirilə bilər. Novator.az xəbər verir ki, sentyabrın 27-də referendum aktı layihəsi parlamentin konstitusiya qanunvericiliyi, dövlət quruculuğu və reqlament komitəsində müzakirə olunub. Komitə layihəni ilk oxunuşda bəyənib və parlamentin müzakirəsinə tövsiyə edib.
Eyni zamanda komitə referendumun əvvəllər deyildiyi kimi noyabr yox, dekabr ayında keçirilməsini məsləhət bilib. Parlament komitənin qərarını dəstəkləsə, referendum dekabrın 4-də keçiriləcək.
Konstitusiyaya düzəlişlər layihəsi parlamentin müzakirəsinə oktyabrın 7-də çıxarılacaq.
Parlamentin 4 fraksiyasının (Sosial Demokrat, Respublika – Ata Yurd, Tərəqqi və Qırğızıstan partiyaları) təklifi olan layihədə baş nazirin səlahiyyətlərini artırmaq təklif olunur. Referendum aktında deputatın eyni zamanda baş nazir və ya baş nazirin müavini postu tutmasının mümkünlüyü barədə müddəa da yer alır.
Qırğızıstan prezidenti Almazbek Atambayev konstitusiya dəyişiklikləri layihəsinin son variantına sentyabrın 21-də xeyir-dua verib. Dövlət başçısı layihənin referenduma çıxarılmasını dəstəkləyən bəyanat yayıb.
Konstitusiya dəyişiklikləri layihəsi məhkəmə sisteminin, Konstitusiya Məhkəməsinin fəaliyyətində yenilik təkliflərini də əhatə edir.
Parlament respublikası olan Qırğızıstanda baş nazirin rəhbərlik etdiyi hökumət ali icraedici orqandır. Baş nazir postuna namizədi parlamentdə deputatların yarıdan çoxunu təşkil edən fraksiya və ya koalisiya irəli sürür. Parlament hökumətin tərkibini və proqramını təsdiqlədikdən sonra prezident baş naziri və hökumət üzvlərini vəzifəyə təyin edir.
