“Günəşli”dəki yanğın söndürülüb
“Azneft” İstehsalat Birliyinin “28 May” adına Neft-Qazçıxarma İdarəsinin “Günəşli” yatağının 19-cu özülündə baş vermiş yanğın söndürülüb. Məlumatı Fövqəladə Hallar Nazirliyi və Dövlət Neft Şirkətinin mətbuat xidmətləri yayıb.
Məlumatda deyilir ki, sentyabrın 26-da “Günəşli” yatağının 19-cu özülündə 71 saylı quyuda təmir işləri aparılarkən qaz təzahürü meydana çıxıb və açıq fontana çevrilib. Saat 18 radələrində isə fontanın bağlanması üçün aparılan işlər zamanı qaz təzahürünün ani alışması nəticəsində yanğın hadisəsi baş verib. Dərhal Fövqəladə Hallar Nazirliyinin Dövlət Yanğından Mühafizə Xidmətinin yanğınsöndürən-xilasediciləri özüldə olan 69 nəfəri “Vixr-5” yanğınsöndürmə gəmisinə təxliyə ediblər.
Mətbuat xidmətinin birgə məlumatına görə, sentyabrın 27-si səhər yanğın söndürülüb, həmçinin qaz təzahürünün qarşısı alınıb.
