Dekabrın 1-dən Azərbaycan tam rəqəmli yayıma keçir
Sentyabrın 27-si Milli Televiziya və Radio Şurasının iclasında rəqəmli yayıma keçid vəziyyəti müzakirə olunub. Rəsmi məlumata görə, yerüstü yayımlanan TV proqramlarının analoq yayımının 1 noyabr 2016-cı ildən Bakı və Abşeron yarımadasında, 1 dekabr 2016-cı ildən digər bölgələrdə dayandırılması barədə qərar qəbul edilib.
Azərbaycan ərazisində yerüstü yayımlanan TV proqramlarının analoq TV qəbulediciləri ilə izlənməsi üçün DVB-T standartına uyğun olan dekoderlərin (“Set-Top-Box”ların) istifadəsi ilə bağlı maarifləndirmə tədbirlərinin aparılması və dekoderlərin satışının təşkili tövsiyə edilib. Televiziya tamaşaçılarından mövcud analoq TV qəbulediciləri vasitəsilə rəqəmli TV yayımının izlənməsi üçün tələb olunan dekoderləri (“Set-Top-Box”ların) əldə etmək xahiş olunur.
