Klinton və Tramp: kim harada önə çıxıb?
ABŞ-da prezidentliyə namizədlərin hansı ştatlarda üstün olduğu bilinib.
Prezident seçkisi noyabrın 8-də keçiriləcək. Dövlət başçısını ştatların seçki günü müəyyənləşən nümayəndələri – 538 nəfərlik Seçicilər Kollegiyası seçir. Ştatların neçə nümayəndə seçməsi əhalinin sayından asılıdır.
Prezident seçilmək üçün 538 nümayəndədən 270-nin səsini qazanmaq lazımdır.
Novator.az bildirir ki, hazırda Demokratlar Partiyasının namizədi Hillari Klintonun 273 səs toplamaq imkanı var. Respublikaçılar Partiyasının namizədi Donald Tramp 191 səs toplamaq imkanındadır. 74 seçici iki namizəd arasında tərəddüd edir.
Məlumatı yayan Abcnews.go.com namizədlərin hansı ştatlarda üstün olduğunu da açıqlayıb. Seçicisi çox olan ştatlardan Kaliforniyada (55 seçici), Nyu-Yorkda (29) Klinton üstündür, Texasda (38) Tramp öndədir.
Klinton İllinoys (20), Nyu-Cersi (14), Vaşinqton (12), Massaçusets (11), Merilend (10), Minnesota (10) ştatlarında da Trampı qabaqlayır.
Tramp Tennesi (11), İndiana (11), Alabama (9), Cənubi Karolina (9), Luiziana (8) ştatlarında liderlik edir.
Donald Tramp 1946-cı ildə Nyu-York ştatında doğulub. Nyu-York Hərbi Akademiyasını və Pensilvaniya Universitetinin Uorton Biznes Məktəbini bitirib. Tikinti maqnatıdır.
Hillari Klinton 1947-ci ildə Çikaqoda doğulub. Yel Universitetinin hüquq fakültəsini bitirib. 1993-2001-ci illərdə prezident postunu tutmuş Bill Klintonun xanımıdır. 2009-2013-cü illərdə ABŞ-ın dövlət katibi olub.
