Forumda həm hesabat verilib, həm kredit
İqtisadiyyat Nazirliyinin Sahibkarlığa Kömək Milli Fondu sentyabrın 22-də Ağstafa rayonunun Göycəli kəndində işgüzar forum keçirib. Rəsmi məlumata görə, 90-a yaxın sahibkarın iştirak etdiyi forumda çıxış edən Sahibkarlığa Kömək Milli Fondunun icraçı direktorunun müavini Arif Vəliməmmədov bildirib ki, 2016-cı ildə 1769 sahibkara 102,7 milyon manat güzəştli kredit verilib. Bu kreditlərdən istifadə etməklə investisiya layihələrinin reallaşdırılması 5500-ə yaxın yeni iş yerinin yaradılmasına imkan yaradır.
Qeyd edilib ki, ümumilikdə indiyədək Gəncə-Qazax iqtisadi rayonunda fəaliyyət göstərən sahibkarlıq subyektlərinin 6000-dən çox investisiya layihəsinin maliyyələşdirilməsinə 221,6 milyon manat güzəştli kredit ayrılıb.
İşgüzar forum çərçivəsində Ağstafa və ətraf rayonlardan olan 48 sahibkar 610 min manat güzəştli kredit alıb. Kreditlər əsasən heyvandarlıq, quşçuluq, tərəvəzçilik, bağçılıq, un məmulatları istehsalı sahələrinin inkişafına yönəldiləcək. Bu kreditlərin reallaşdırılması hesabına 50-dən çox yeni iş yerinin açılması mümkün olacaq.
