Cəbhəçi gənc cəzadan azad olunmadı
Sentyabrın 22-də AXCP Gənclər Komitəsinin həbsdə olan üzvü Elvin Abdullayevin cəzasının çəkilməmiş hissəsindən azad edilməsi üçün verilmiş iddiaya baxılıb.
Elvin Abdullayev 2015-ci ilin əvvəlindən həbsdədir. Həmin ilin iyununda Bakı Ağır Cinayətlər Məhkəməsi onu Cinayət Məcəlləsinin 234.4.3-cü maddəsi (külli miqdarda narkotik maddənin qanunsuz dövriyyəsi) ilə təqsirli bilərək 6 il müddətinə azadlıqdan məhrum edib. 2016-cı ilin iyununda Ali Məhkəmə 234.4.3-cü maddəni 234.1-ci maddə (satış məqsədi olmadan qanunsuz olaraq şəxsi istehlak miqdarından artıq miqdarda narkotik maddə saxlama) ilə dəyişdirərək Elvin Abdullayevin cəzasını 2 il 6 aya endirib.
Elvin Abdullayev hazırda 14 saylı Cəzaçəkmə Müəssisəsində saxlanılır. Sentyabrın 22-də keçirilən proses bu müəssisədə təşkil olunub. Qaradağ Rayon Məhkəməsinin hakimi Rəşad Məmmədovun sədrliyi ilə keçirilən prosesdə iddia təmin edilməyib.
Vəkil Fəxrəddin Mehdiyev “Azadlıq” radiosuna deyib ki, Ali Məhkəmənin qərarından sonra Elvin Abdullayevin təqsirli bilindiyi maddə cəzanın çox hissəsini çəkmiş şəxsin vaxtından əvvəl azadlığa buraxılmasına hüquqi cəhətdən imkan yaradır: “2 il 6 aylıq cəzanın yarısı 1 il 3 ay edir. Bundan sonra məhbus azad oluna bilər. Elvin isə artıq 1 il 8 aydır cəza çəkir. Amma 14 saylı Cəzaçəkmə Müəssisəsinin rəhbəri Elvin Abdullayev barədə mənfi rəy verdiyi üçün məhkəmə Elvini vaxtından əvvəl azadlığa buraxmaqdan imtina etdi”.
Fəxrəddin Mehdiyev Qaradağ Rayon Məhkəməsinin qərarından apellyasiya şikayəti veriləcəyini vurğulayıb.
