Tereza Mey quldarlıqla mübarizəyə çağırır
Böyük Britaniyanın baş naziri Tereza Mey beynəlxalq ictimaiyyəti müasir quldarlıq problemi ilə mübarizə aparmağa çağırıb.
Novator.az-ın məlumatına görə, BMT Baş Assambleyasının təşkil etdiyi müzakirələrdə çıxış edən baş nazir dünyada 45 milyon insanın quldarlığın qurbanı olduğunu vurğulayıb: “45 milyon adam qeyri-insani davranışlara məruz qalır. Ona görə də mən köləliyin aradan qaldırılması üçün beynəlxalq fəaliyyəti artırmağın tərəfindəyəm”.
Tereza Mey bu istiqamətdə beynəlxalq əməkdaşlığı gücləndirməyə, bu növ cinayətlərə qarşı mübarizə aparmaq üçün qanunverici normaları sərtləşdirməyə səsləyib.
Rəsmi məlumata görə, Böyük Britaniya hökuməti quldarlığın geniş yayıldığı ölkələrdə köləliklə mübarizə üçün 33 milyon funt sterlinq vəsait ayırmaq niyyətindədir. Bir çox belə ölkədən Böyük Britaniyaya quldarlıq qurbanları axışır. Təkcə Nigeriyaya 5 milyon funt ayrılacağı qeyd olunur.
Avstraliyanın “Walk Free Foundation” təşkilatının bu ilin iyun ayında yaydığı hesabata görə, dünyada 45,8 milyon adam qul vəziyyətində saxlanır. Söhbət təzyiq, qorxutma, aldatma yolu ilə hər hansı bir işi görməyə məcbur edilən şəxslərdən gedir.
Hesabata əsasən, Hindistanda 18,35 milyon qul var. İkinci yerdə Çin (3,39 milyon), üçüncü yerdə Pakistan (2,13 milyon), dördüncü yerdə Banqladeş (1,53 milyon), beşinci yerdə Özbəkistan (1,23 milyon) gəlir.
Şimali Koreyada əhalinin 4,37%-nin qul vəziyyətində yaşadığı bildirilir.
“Walk Free Foundation” təhqiqatı 167 ölkədə aparıb. Hesabata görə, Azərbaycan əhalisinin 0,467%-i təzyiq, qorxutma, aldatma yolu ilə hər hansı bir işi görməyə məcbur edilir.
