“Azadlıq”a işıq ucu görünür
“Azadlıq” qəzetinin redaksiyası yeni məlumat yayıb. Məlumatda qeyd olunur ki, qəzetin nəşrində problemlər davam edir: “Başlıca problemlərdən biri – imza nümunəsi məsələsi həll edilsə də, qəzetin hesabı olan Beynəlxalq Bank bununla yanaşı daha bir sənəd istəyir. Bu sənədi təqdim etmək mümkün olmayıb. Sentyabrın 20-də həmin sənəd banka təqdim ediləcək. Ümid edirik ki, bundan sonra qəzetin nəşri mümkün olacaq”.
Avqustun 20-də qəzetin maliyyə direktoru Faiq Əmirli həbs edilib. İstintaq onu ABŞ-da yaşayan türkiyəli ilahiyyatçı Fətullah Gülənin rəhbərlik etdiyi “Hizmət hərəkatı”nın nümayəndəsi olmaqda, Azərbaycanda “fətullahçılığı” təbliğ etməkdə, dini ayinlərin icrası adı altında vətəndaşların hüquqlarını pozmaqda, öz qulluq mövqeyindən istifadə etməklə sosial, dini nifrət və düşmənçilik salmaq cəhdində günahlandırır.
Faiq Əmirlinin həbsindən sonra “Azadlıq” qəzetinin redaksiyası bank əməliyyatı apara bilmir. Maliyyə direktorunun səlahiyyətlərini icra etməsi, bank əməliyyatları apara bilməsi üçün başqa şəxsin imza nümunəsinin rəsmən təsdiqlənməsi lazım gəlib. Bu iş uzandığı üçün sentyabrın 5-də “Azərbaycan” nəşriyyatı qəzetin çapından imtina edib. İmtinaya əsas kimi qəzetin nəşriyyata olan borcu göstərilib. Redaksiya bəyan edib ki, borcu ödəməməsinin səbəbi qəzetin bank əməliyyatı apara bilməməsidir.
“Azadlıq” qəzeti 1989-cu il dekabrın 24-dən çıxır.
