İnsan haqqı: Azərbaycan 100 mümkün baldan 16 bal toplayıb
Mərkəzi qərargahı ABŞ-da olan “Freedom House” beynəlxalq insan haqqı təşkilatı 2016-cı il üzrə hesabat açıqlayıb. Novator.az bildirir ki, hesabat 195 ölkədə və 15 ərazidə insan hüquq və azadlıqlarının durumunu qiymətləndirir.
Qiymətləndirmə 0-100 bal arasında aparılıb. Azərbaycan 16 balla qeyri-azad ölkələr siyahısında yer alır. Qonşu Ermənistan 46 balla qismən azad ölkələr siyahısındadır.
Qismən azad ölkələr sırasına keçmiş SSRİ məkanından Gürcüstan (64 bal), Ukrayna (61 bal), Moldova (60 bal) və Qırğızıstan da (38 bal) daxil edilib.
Özbəkistan (3 bal), Türkmənistan (4 bal), Tacikistan (16 bal), Belarus (17 bal), Rusiya (22 bal), Qazaxıstan (24 bal) qeyri-azad ölkələr arasındadır.
Latviya (86 bal), Litva (91 bal) və Estoniya (94 bal) azad ölkələr sayılır.
İran 17 balla qeyri-azad, Türkiyə 53 balla qismən azad ölkələr içindədir.
195 ölkə arasında insan hüquq və azadlıqlarının ən yüksəkdə olduğu ölkələr Norveç, San Marino və İsveçdir. Bu ölkələrin hər biri 100 bal toplayıb.
Somali 2 balla qeyri-azad ölkələr siyahısının sonunda gəlir. Suriyaya isə qeyri-azad ölkə kimi mənfi 1 (-1) bal verilib.
Hesabata görə, 195 ölkənin 86-sı azad, 59-u qismən azad, 50-si qeyri-azaddır.
“Freedom House” mübahisəli saydığı 15 ərazi üzrə də qiymətləndirmə aparıb. Azərbaycanın işğal olunmuş ərazisi Dağlıq Qarabağ hesabatda 33 balla qismən azad region kimi qeyd edilib.
