Xarici ticarətinin həcmi 24,96% azalıb
2016-cı ilin yanvar-avqust aylarında Azərbaycanın xarici ticarətinin həcmi ötən ilin 8 ayına nisbətən 24,96% azalaraq 11 milyard 330 milyon 269 min ABŞ dolları olub. İxrac (5 milyard 790,2 milyon dollar) idxalı (5 milyard 539,9 milyon dollar) 250,3 milyon dollar üstələyib.
Novator.az-ın məlumatına görə, Dövlət Gömrük Komitəsi 2015-ci ilin yanvar-avqust ayları ilə müqayisədə idxal əməliyyatlarında 6,23%, ixrac əməliyyatlarında 37% geriləmə olduğunu bildirir.
8 ayda Azərbaycanın ixracının 71,93%-ni xam neft, 4,08%-ni neft məhsulları, 10,93%-ni təbii qaz təşkil edib.
İdxalda isə yeyinti məhsulları 14,81%-lə ön sıralarda durur.
Rəsmi hesabata əsasən, yanvar-avqust aylarında 173 ölkə ilə ticarət əməliyyatları aparılıb.
2016-cı ilin 8 ayında Gömrük Komitəsinin xətti ilə dövlət büdcəsinə 1 milyard 426,2 milyon manat daxil olub (Hesabat).
