Mirqədirov Avropaya getdi
Şərti həbsə məhkum olunmuş jurnalist Rauf Mirqədirov sentyabrın 16-da Avropaya gedib. “Meydan TV”yə danışan jurnalist deyib ki, Varşavada üçgünlük seminarda iştirak edəcək.
Rauf Mirqədirov İsveçrəyə də baş çəkərək ailə üzvləri ilə bir araya gələcəyini vurğulayıb: “Məhkəmə ölkəni tərk etməklə bağlı müraciətimi təmin edib”.
Jurnalist ölkəyə qayıdıb-qayıtmayacağı barədə suala belə cavab verib: “Hələ bu barədə heç nə deyə bilmərəm”.
Novator.az bildirir ki, 2014-cü il aprelin 19-da tutulan jurnalist dövlətə xəyanətdə təqsirli bilinib. İttihama görə, jurnalist Sülh və Demokratiya İnstitutunun xətti ilə Ermənistan xüsusi xidmət orqanlarına casusluq edib. 2015-ci il dekabrın 28-də Bakı Ağır Cinayətlər Məhkəməsi Rauf Mirqədirovu 6 il müddətinə azadlıqdan məhrum edib.
Bu iş üzrə Sülh və Demokratiya İnstitutunun direktoru Leyla Yunus və onun həyat yoldaşı Arif Yunus da ittiham edilib, sonra bu ittiham üzrə icraat dayandırılıb.
Bu il martın 17-də Bakı Apellyasiya Məhkəməsi jurnalistin cəzasını 5 il sınaq müddəti tətbiq olunmaqla şərti həbslə əvəzləyib və Rauf Mirqədirov məhkəmə zalından azadlığa buraxılıb.
55 yaşlı Rauf Mirqədirov Rauf Mirqədirov uzun illər “Zerkalo” qəzetinin siyasi icmalçısı olub, 2010-cu ildən qəzetin Türkiyədə xüsusi müxbiri postunda çalışıb.
2014-cü ilin dekabr ayında İsveçrədə Rauf Mirqədirovun həyat yoldaşına, iki qızına siyasi sığınacaq verilib.
