Kərimovun yerini tutan Mirziyayev prezidentliyə namizəd göstərildi
Özbəkistan prezidenti səlahiyyətlərinin icraçısı, baş nazir Şövkət Mirziyayevin dövlət başçısı postuna namizədliyi irəli sürülüb. Novator.az-ın məlumatına görə, Özbəkistan Mərkəzi Seçki Komissiyası sentyabrın 16-da belə açıqlama yayıb.
Dekabrın 4-də Özbəkistanda növbədənkənar prezident seçkisi keçiriləcək. Namizədlərin rəsmən irəli sürülməsi prosesi oktyabrın 20-nə qədər davam edəcək.
Mərkəzi Seçki Komissiyasının məlumatında bildirilir ki, Şövkət Mirziyayevi üzvü olduğu Liberal Demokrat Partiyasının Siyasi Şurası prezidentliyə namizəd göstərib.
Özbəkistana 1989-cu ildən rəhbərlik edən prezident İslam Kərimov 2016-cı il sentyabrın 2-də dünyasını dəyişib. Konstitusiyaya görə, prezident səlahiyyətləri Senatın sədri Niqmatilla Yoldaşova keçib. Sentyabrın 8-də Niqmatilla Yoldaşov prezident səlahiyyətlərinin icrasından imtina edib və baş nazir Şövkət Mirziyayev prezident səlahiyyətlərinin icraçısı təyin olunub.
59 yaşlı Şövkət Mirziyayev 1981-ci ildə Daşkənd İrriqasiya və Meliorasiya İnstitutunu bitirib. 1992-ci ilədək həmin institutda elmi işçi, komsomol təşkilatının katibi, partiya təşkilatının rəhbəri, 1-ci prorektor vəzifələrində çalışıb.
1990-cı ildə Özbəkistan Ali Sovetinin, 1994 və 1999-cu illərdə Ali Məclisin deputatı seçilib. Daşkəndin Mirzə-Uluqbəy rayonunun, Cizak və Səmərqənd vilayətlərinin icra hakimi olub.
2003-cı il dekabrın 12-dən baş nazirdir.
