Büdcə təşkilatlarının idxal malları alması dayandırıldı
Azərbaycan prezidenti icra hakimiyyəti orqanlarının və dövlət büdcəsindən maliyyələşən təşkilatların fəaliyyətində satınalmaların səmərəliliyini artırmaq fərmanı imzalayıb. Novator.az-ın məlumatına görə, sentyabrın 15-də verilən fərmanla icra hakimiyyəti orqanları və dövlət büdcəsindən maliyyələşən təşkilatların 2018-ci il yanvarın 1-dək idxal mallarını (işlərini, xidmətlərini) satın alması dayandırılır.
Məhdudiyyət dövlət zəmanəti ilə alınmış xarici kreditlər, xarici qrantlar, ölkənin müdafiəsi və dövlət təhlükəsizliyi ehtiyacları ilə bağlı idxal olunan malların (işlərin, xidmətlərin), dərman və tibb vasitələrinin satın alınmasına şamil edilmir.
Fərman qüvvəyə mindiyi günədək bağlanmış müqavilələr üzrə idxal mallarının (işlərinin, xidmətlərinin) satın alınması zərurəti yaranarsa, icra hakimiyyəti orqanları və dövlət büdcəsindən maliyyələşən təşkilatların həmin malları (işləri, xidmətləri) satın almasına razılıq verilməsi barədə qərarı Azərbaycan prezidenti ilə razılaşdırmaqla İqtisadiyyat Nazirliyi qəbul edir. 2018-ci il yanvarın 1-dək idxal mallarının (işlərinin, xidmətlərinin) satın alınması zərurəti yarananda da eyni qayda tətbiq olunur.
İqtisadiyyat Nazirliyi Maliyyə Nazirliyi ilə birlikdə icra hakimiyyəti orqanları və dövlət büdcəsindən maliyyələşən təşkilatların idxal mallarını (işlərini, xidmətlərini) satın almasına xərclənən vəsait barədə üç ayda bir dəfə prezidentinə məlumat verməlidir.
