Sərəncam: Pirallahı Sənaye Parkı yaradılır
Prezident İlham Əliyev Bakının Pirallahı rayonu ərazisində Pirallahı Sənaye Parkı yaradılmasına sərəncam verib. Sentyabrın 14-də imzalanan sərəncama əsasən, Pirallahı Sənaye Parkı sahibkarlıq fəaliyyətinin həyata keçirilməsi üçün zəruri infrastrukturu və idarəetmə qurumları olan, müasir texnologiyaların tətbiqi yolu ilə sənaye, o cümlədən əczaçılıq sənayesi üzrə rəqabət qabiliyyətli məhsul istehsalı və xidmət göstərilməsi, habelə emal müəssisələrinin yaradılması üçün istifadə edilən, sahibkarların səmərəli fəaliyyətinə və inkişafına kömək edən ərazidir.
Pirallahı Sənaye Parkının fəaliyyətinin təşkili, idarə olunması və inkişafı ilə bağlı tədbirləri İqtisadiyyat Nazirliyinin tabeliyində yaradılmış “Sumqayıt Kimya Sənaye Parkı” Məhdud Məsuliyyətli Cəmiyyəti həyata keçirəcək. Nazirlər Kabineti Pirallahı Sənaye Parkının fəaliyyəti üçün rayonda 30 hektar torpaq sahəsinin icarə hüququ ilə MMC-nin daimi istifadəsinə verilməsini iki ay müddətində təmin etməlidir.
Pirallahı Sənaye Parkının fəaliyyətinin təşkilini, həmin ərazinin istifadəyə yararlı vəziyyətə gətirilməsini, xarici və daxili infrastrukturun yaradılmasını təmin etmək məqsədi ilə 2016-cı ilin dövlət büdcəsindən, prezidentin ehtiyat fondundan İqtisadiyyat Nazirliyinə ilkin olaraq 4 milyon manat ayrılır.
