Müxalifətin hər iki mitinqinə razılıq verildi
Bakı Şəhər İcra Hakimiyyəti müxalif qüvvələrin paytaxta təyin etdiyi hər iki mitinqə razılıq verib.
Beləliklə, sentyabrın 17-də Demokratik Qüvvələrin Milli Şurası, ayın 18-də isə Müsavat Partiyası “İnşaatçılar” metro stansiyası yaxınlığındakı stadionda aksiya keçirəcək.
Milli Şuranın mitinqi saat 15-dən 17-yə, Müsavatın mitinqi saat 17-dən 19-dək davam edəcək.
Hər iki aksiyada əsas məqsəd sentyabrın 26-da ölkədə keçiriləcək referenduma etiraz etməkdir.
Referenduma konstitusiya dəyişiklikləri layihəsi çıxarılıb. Dəyişikliklər prezident seçilmək üçün 35, hakim olmaq üçün 30, deputat mandatı almaq üçün 25 yaş şərtlərini aradan qaldırır, prezidentin səlahiyyət müddətini 5 ildən 7 ilə artırır. Dövlət başçısına növbədənkənar prezident seçkisi elan etmək, parlamenti buraxmaq hüququ verilir.
Başqa bir yenilik vitse-prezident postlarının təsisini nəzərdə tutur. Layihəyə görə, birinci vitse-prezidenti və vitse-prezidentləri Azərbaycan prezidenti vəzifəyə təyin və vəzifədən azad edir, növbədənkənar prezident seçkisi zamanı dövlət başçısının səlahiyyətləri birinci vitse-prezidentə keçir.
