Köçkün düşmüş 3,7 milyon uşaq təhsil ala bilmir
Məcburi köçkün düşmüş 6 milyon uşaqdan 3,7 milyonunun təhsil almaq imkanı yoxdur. Novator.az-ın məlumatına görə, BMT-nin Qaçqınlar üzrə Ali Komissarlığının sentyabrın 15-i Cenevrədə dərc etdiyi məruzədə belə deyilir.
Məruzədə bildirilir ki, 1,75 milyon qaçqın uşaq ibtidai məktəbə, 1,95 milyon uşaq isə orta məktəbə getmir. Qaçqınların təhsildən qalma riski dünyadakı orta göstəricidən 5 dəfə çoxdur.
Hesabata əsasən, qaçqın və məcburi köçkün uşaqların yalnız yarısı ibtidai təhsil müəssisələrinə gedir. Dünya üzrə uşaqların 84%-i orta təhsil, 34%-i isə ali təhsil aldığı halda yeniyetmə qaçqınların 22%-i orta məktəbə gedə və onların yalnız 1%-i ali məktəbə daxil ola bilir.
2011-ci ildən bəri fəlakət içində olan Suriyada 2,1 milyon uşaq və yeniyetmə məktəbə getmir. Bu ölkədə 5 illik hərbi münaqişə ərzində ibtidai və orta məktəb təhsili alma həddi 94%-dən 60%-ə enib. BMT-nin Qaçqınlar üzrə Ali Komissarlığının məlumatına görə, Suriyanı 4,8 milyon insan tərk edib. Onlardan 900 mini hazırda təhsil ala bilməyən məktəb yaşlı uşaqlardır.
