Ermənistanda yeni baş prokuror
Sentyabrın 15-də Ermənistan parlamenti Artur Davtyanı baş prokuror postuna təsdiqləyib. Bu günədək baş prokurorun müavini vəzifəsini tutan Davtyanın namizədliyini Ermənistan prezidenti Serj Sərkisyan irəli sürmüşdü.
Novator.az-ın məlumatına görə, Davtyanın namizədliyi parlamentdə iki günlük müzakirələrdən sonra səsverməyə çıxarılıb. Gizli (bülletenlə) səsvermədə 97 deputat onu dəstəkləyib, 3 nəfər təyinatın əleyhinə çıxıb.
Ermənistanın əvvəlki baş prokuroru Gevork Kostanyan avqustun əvvəlində səhhətinə görə istefa verib. Gevork Kostanyan baş prokuror postunu 2013-cü ildən tuturdu.
Artur Davtyan 1978-cı ildə Ermənistanın Şirak vilayətində anadan olub. Yerevan Dövlət Universitetinin hüquq fakültəsini bitirib. Hüquq elmləri namizədidir. 2006-cı ildən prokurorluq sistemində işləyir. 2013-2016-cı illərdə paytaxt Yerevanın prokuroru olub, 2016-cı ilin iyununda baş prokuror müavini təyin edilib.
Ermənistanda baş prokurorun səlahiyyət müddəti 6 ildir.
