Qadınların 36 faizi ödənişli analıq məzuniyyətinə çıxa bilir
AZƏRTAC-ın məlumatına görə, Beynəlxalq Əmək Təşkilatı “Uşaqların sosial müdafiəsi: siyasət sahəsində əsas tendensiyalar və statistik məlumatlar” adlı araşdırmasında dünyada işləyən qadınların cəmi 36 faizinin ödənişli analıq məzuniyyəti hüququ olduğunu bildirir: “Qanunun qeyri-səmərəli icrası nəticəsində qadınların yalnız 28 faizi müavinət alır. 108 ölkədə qanunvericilik yolu ilə uşaqlara xüsusi müavinət proqramları nəzərdə tutulur, lakin bundan əhalinin kiçik qrupu istifadə edir”.
Beynəlxalq Əmək Təşkilatının sosial müdafiə departamentinin rəhbəri İzabel Ortiz deyir ki, Avropada vergi-büdcə siyasəti üzrə tədbirlər qadın və uşaqlara pis təsir edib. Onun sözlərinə görə, Avropa İttifaqında uşaqlar arasında yoxsulluq göstəricisi yüksək ölkələrin sayı 2008-2013-cü illərdə 18-dən 28-ə çatıb.
Məruzədə analıq məzuniyyətinin müddəti də nəzərdən keçirilir. Keçmiş SSRİ ölkələri bu göstərici üzrə birinci yerdədir. Rusiya və Tacikistanda hamiləlik dövründə və doğuşdan sonrakı dövr üçün məzuniyyət 140 gün, Azərbaycan, Belarus, Qazaxıstan, Qırğızıstan, Moldova, Özbəkistan və Ukraynada 126 gündür.
