Karen Karapetyan baş nazir təyin olunub
Ermənistan prezidenti Serj Sərkisyan sentyabrın 13-də Karen Karapetyanı baş nazir təyin edib. Novator.az-ın məlumatına görə, Karen Karapetyanı baş nazir postuna Serj Sərkisyanın sədrlik etdiyi hakim Respublika Partiyası sentyabrın 8-də namizəd göstərmişdi. Əvvəlki baş nazir Ovik Abramyan həmin gün istefa verib. Ovik Abramyan 2014-cü il aprelin 13-dən baş nazir idi.
Karen Karapetyan 1963-cü il avqustun 14-də Azərbaycanın Dağlıq Qarabağ bölgəsində, Stepanakert şəhərində doğulub, Yerevanda böyüyüb.
1985-ci ildə Yerevan Dövlət Universitetinin tətbiqi riyaziyyat fakültəsini bitirən Karen Karapetyan iqtisad elmləri doktorudur. Yerevan Dövlət Universitetinin müəllimi olub, uzun illər energetika sahəsində rəhbər vəzifələrdə çalışıb, “Qazprom-Ermənistan” şirkətinə rəhbərlik edib. 2010-2011-ci illərdə Yerevanın meri olub.
Baş nazir dəyişdiyi üçün Ermənistan hökuməti 20 gün ərzində yenilənməlidir.
Baş nazirlə birgə Ermənistan hökuməti hazırda 27 nəfərdən ibarətdir. Ölkədə 19 nazir var. Beynəlxalq iqtisadi inteqrasiya və islahatlar naziri (eyni zamanda baş nazirin müavinidir); diaspor; xarici işlər; müdafiə; təbiəti mühafizə; kənd təsərrüfatı; ərazi idarəçiliyi və inkişaf; əmək və sosial məsələlər; iqtisadiyyat; ədliyyə; şəhərsalma; səhiyyə; mədəniyyət; elm və təhsil; fövqəladə hallar; gənclər və idman; nəqliyyat və rabitə; maliyyə; energetika və təbii ehtiyatlar nazirlərinin daxil olduğu kabinetin tərkibində daha 7 qurumun (Mülki Aviasiya Baş İdarəsi, Daşınmaz Əmlakın Kadastrı Komitəsi, Nüvə Təhlükəsizliyi Komitəsi, Ermənistan Polisi, Milli Təhlükəsizlik Xidməti, Dövlət Əmlakı İdarəsi, Dövlət Gəlirləri İdarəsi) rəhbərləri yer alır.
