Bayram Məmmədovun həbs müddəti artırılıb
Narkotik maddələrin qanunsuz dövriyyəsində təqsirləndirilən gənc fəal Bayram Məmmədovun həbs müddəti 2 ay artırılıb. Qərar Xətai Rayon Məhkəməsində çıxarılıb.
Gənc fəalın işini araşdıran müstəntiq və prokuror bununla bağlı Xətai Rayon Məhkəməsinə müraciət etmişdi.
“Azadlıq” radiosunun xəbərinə görə, vəkil Elçin Sadıqov bildirib ki, qərardan apellyasiya şikayəti veriləcək: “Bu müddət ərzində Bayram Məmmədovla bağlı heç bir istintaq hərəkəti aparılmayıb. Biz bunu məhkəmənin də nəzərinə çatdırdıq. Qərarı əsasız sayırıq. Qərardan şikayət verəcəyik. Eyni zamanda Bayramın ev dustaqlığına buraxılması ilə də bağlı vəsatət verəcəyik”.
B.Məmmədov digər gənc fəal Qiyas İbrahimovla birgə mayın 10-da saxlanıb. Mayın 12-də Xətai Rayon Məhkəməsi hər iki gənc haqqında 4 aylıq həbs qətimkan tədbiri seçib. Gənclər Cinayət Məcəlləsinin 234.4.1-ci (qanunsuz olaraq narkotik vasitələri, psixotrop maddələri və ya onların prekursorlarını hazırlama, istehsal etmə, əldə etmə, saxlama, daşıma, göndərmə və ya satma, qabaqcadan əlbir olan bir qrup şəxs tərəfindən və ya mütəşəkkil dəstə tərəfindən törədildikdə) və 234.4.3-cü (külli miqdarda törədildikdə) maddələri ilə ittiham olunurlar. Gənclərin özləri isə onlar işgəncə altında etirafedici ifadə verməyə məcbur edildiklərini bildiriblər.
Daxili İşlər Nazirliyi və Ombudsman Aparatı gənclərə işgəncə verilməsini təkzib edib.
Müdafiəçiləri isə hər iki gəncin siyasi sifarişlə tutulduğunu iddia edirlər. Bildirilir ki, mayın 10-na gecə Bakının mərkəzində Heydər Əliyevin abidəsinin üzərində etirazçı şüarlar yazılıb. Müdafiəçiləri gənclərin bu şüarlara görə saxlandığını vurğulayırlar.
Q.İbrahimovun işi artıq məhkəməyə göndərilib.
