Milli Şura sentyabrın 11-nə mitinq təyin edib
Demokratik Qüvvələrin Milli Şurası sentyabrın 26-da ölkədə keçiriləcək referenduma etiraz olaraq mitinqlərə başlamaq qərarına gəlib. Şura ilk mitinqini sentyabrın 11-nə təyin edib.
Milli Şuranın üzvü, AXCP sədri Əli Kərimli Facebook şəbəkəsində bildirib ki, sentyabrın 11-i saat 17-yə paytaxtın “İnşaatçılar” metrostansiyası yaxınlığındakı “Məhsul” stadionuna təyin edilən mitinqlə bağlı Bakı Şəhər İcra Hakimiyyətinə müraciət olunacaq.
Əli Kərimli aksiyanın “Monarxiyaya yox!”, “Talana son!” şüarları ilə keçiriləcəyini açıqlayıb.
Sentyabrın 26-da konstitusiyaya dəyişiklik referendumu keçiriləcək. Referendum aktı layihəsində konstitusiyanın 25-dən çox maddəsində dəyişikliklər təklifi yer alır. Eyni zamanda ana qanuna bir neçə yeni maddə təklif olunur. Dəyişikliklər prezident seçilmək üçün 35, hakim olmaq üçün 30, deputat mandatı almaq üçün 25 yaş şərtlərini aradan qaldırır, dövlət başçısının səlahiyyət müddətini 5 ildən 7 ilə artırır. Dövlət başçısına növbədənkənar prezident seçkisi elan etmək, parlamenti buraxmaq səlahiyyəti verilir.
Başqa bir yenilik vitse-prezident postlarının təsisini nəzərdə tutur. Layihəyə görə, birinci vitse-prezidenti və vitse-prezidentləri Azərbaycan prezidenti vəzifəyə təyin və vəzifədən azad edir, növbədənkənar prezident seçkisi zamanı dövlət başçısının səlahiyyətləri birinci vitse-prezidentə keçir.
