18, 61, 65, 79, 85, 96 nömrəli avtobuslarda nağd ödəniş dayandı
Paytaxtda 18, 61, 65, 79, 85, 96 marşrut xətləri üzrə hərəkət edən avtobuslar sentyabrın 1-dən nağd ödənişi dayandıraraq kartla ödəməyə keçib. Bakı Nəqliyyat Agentliyi bildirir ki, bu tədbir sərnişindaşıma şirkətləri qarşısında qoyulan vahid kart sisteminə keçid tələbinə uyğun görülüb.
AZƏRTAC-ın məlumatına görə, ilk mərhələdə 6 marşrut xətti üzrə 117 avtobusda validator quraşdırılıb. Yaxın zamanlarda daha 400 avtobusda validatorların quraşdırılması nəzərdə tutulur.
Vahid kart sisteminin tətbiq edildiyi 15 marşrut xəttində və Bakı Metropolitenində gediş haqqının ödənilməsi “Bakıkart” sistemi ilə həyata keçirilir.
Bu günədək kart sistemi 1, 2, 3, 5, 6, 7, 8, 13, 14 saylı marşrut xətlərində, eləcə də “28 May” metro stansiyasından Heydər Əliyev Beynəlxalq Hava Limanı istiqamətində hərəkət edən ekspress avtobuslarda tətbiq olunurdu.
