Yer quruyur
Yer səthinin quru hissəsi artır. Novator.az-ın məlumatına görə, bunu Niderlandın Deltares İnstitutu mütəxəssislərinin apardığı araşdırmalar üzə çıxarıb.
Alimlərin “Nature Climate Change” jurnalında dərc olunmuş araşdırmasında bildirilir ki, son 30 ildə Yer səthinin quru hissəsi 58 min kvadratmetr böyüyüb. Alimlər deyirlər ki, bu prosesə buzlaqların əriməsi və bəndlərin tikilməsindən də çox bir sıra ərazilərin, o cümlədən sahillərin süni yolla qurudulması təsir göstərir.
30 ildə ümumilikdə 115 min kvadratmetr ərazi su altında qalıb, 173 min kvadratmetr su səthi isə qurudulub.
Niderlandlı alimlər NASA-nın peykindən çəkilmiş şəkilləri analiz ediblər. Onların qənaətinə görə, ən miqyaslı təbii daşqın Tibet dağlarında olub. Burada buzlaqların əriməsi nəticəsində yeni böyük göl əmələ gəlib. Mütəxəssislər ən böyük qurumanın isə Aral dənizində olduğunu bildirirlər. 1960-cı illərdən Aral dənizi sürətlə qurumağa başlayıb. Hazırda Aral dənizi iki gölə parçalanıb və demək olar ki, tamamilə quruyub.
