Şikayət verilib. Faiq Əmirli təqsirsiz olduğunu deyir
“Azadlıq” qəzetinin direktoru, AXCP sədrinin köməkçisi Faiq Əmirli barəsində seçilmiş həbs qətimkan tədbirindən apellyasiya instansiyasına şikayəti verilib. “Report”un xəbərinə görə, şikayət Bakı Apellyasiya Məhkəməsinə təqdim edilib. Şikayətə yaxın günlərdə baxılacaq.
“Azadliq.info” xəbər verir ki, Faiq Əmirli avqustun 25-də ailə üzvləri ilə telefon əlaqəsi saxlayıb. Ailəsi ilə telefon söhbətində Faiq Əmirli təqsirsiz olduğunu deyib. O, saxlanma şəraitindən və səhhətindən narazılıq etməyib.
Faiq Əmirli avqustun 20-də Bakıda tutulub. Avqustun 22-də Nəsimi Rayon Məhkəməsi onun barəsində 3 ay müddətinə həbs qətimkan tədbiri seçib.
İstintaq onu ABŞ-da yaşayan türkiyəli ilahiyyatçı Fətullah Gülənin rəhbərlik etdiyi “Hizmət hərəkatı”nın nümayəndəsi olmaqda, Azərbaycanda “fətullahçılığı” təbliğ etməkdə, dini ayinlərin icrası adı altında vətəndaşların hüquqlarını pozmaqda, öz qulluq mövqeyindən istifadə etməklə sosial, dini nifrət və düşmənçilik salmaq cəhdində günahlandırır.
Faiq Əmirli, “Azadlıq” qəzetinin redaksiyası və AXCP rəhbərliyi ittihamları rədd edir, həbsin siyasi xarakter daşıdığını vurğulayır.
