İtaliya: zəlzələdə ölənlərin sayı 267-yə çatıb, 387 yaralı var
İtaliyada baş vermiş zəlzələdə ölənlərin sayı 267-yə çatıb. Novator.az xəbər verir ki, Milli Mülki Müdafiə Xidmətinin avqustun 26-da yaydığı məlumata görə, Mark, Abrusso və Latsio xəstəxanalarında 387 yaralı var. Zəlzələ qurbanları sayının daima artdığı və xilasetmə işlərinin davam etdirildiyi bildirilir.
İtaliyada zəlzələ avqustun 24-nə keçən gecə olub. 6 bal gücündə yeraltı təkanların episentri Akkumoli şəhəri yaxınlığına düşüb. Şəhərdə çoxlu bina dağılıb. İkinci yeraltı təkan yerli vaxtla 4:34-də Umbriya vilayətində baş verib.
Latsio, Umbriya və Mark vilayətlərində daha çox dağıntıların olduğu, ən çox zərərin Amatriçe şəhərinə dəydiyi bildirilir. Bu şəhərdə ölənlərin sayı 207 nəfərdir. Akkumolidə 11, Arkuata-del-Trontoda şəhərciyində 49 nəfər həlak olub.
İtaliyada avqustun 25-i səhər saatlarında da 4,7 bal gücündə yeraltı təkanlar qeydə alınıb.
Milli Mülki Müdafiə Xidmətinin məlumatına görə, 2000-dən çox adam ev-eşiyini itirib, onlar müvəqqəti çadırlarda yerləşdirilib.
