Nazir: “Üzü örtən çarşab – bizim açıq ölkəmizə yaramır”
Almaniyanın daxili işlər naziri Tomas de Mezyer ölkədə müsəlman xanımların baş örtüyünə qismən qadağa tətbiq olunmasını təklif edir.
Bəlli olduğu kimi, müsəlman xanımların bəzisi üzü də tam örtən baş örtüyündən istifadə edir.
Novator.az-ın məlumatına görə, nazir bildirib ki, dövlət və vergi orqanlarında, vətəndaşlıq vəziyyəti aktlarının qeydə alındığı qurumlarda, təhsil ocaqlarında, məhkəmələrdə xanımların üzünün görünməsini məcburi edən hüquqi sənədin imzalanması barədə təkliflər var. “Biz belə bir sənədin imzalanması məsələsində həmrəyik” deyən nazir sözügedən təklifin hüquqi baxımdan qüvvəyə minməsinə tərəfdar çıxdığını diqqətə çatdırıb. Tomas de Mezyer vurğulayıb: “Üzü örtən çarşab – bizim açıq ölkəmizə yaramır”.
Fransada üzü görünməz edən çarşaba 2011-ci ilin aprelində qadağa tətbiq olunub. Avropa İnsan Hüquqları Məhkəməsi 2014-cü ildə bu qərarı qanuni hesab edib.
