Elgiz Qəhrəmanın işi: qərar qüvvədə saxlandı
NİDA Vətəndaş Hərəkatı İdarə Heyətinin üzvü Elgiz Qəhrəman barəsində seçilmiş həbs qərarı qüvvədə saxlanıb.
Elgiz Qəhrəman avqustun 12-də tutulub. Avqustun 15-də bəlli olub ki, Nərimanov Rayon Məhkəməsi avqustun 13-də onun barəsində 4 aylıq həbs qətimkan tədbiri seçib. Həbs qərarından apellyasiya instansiyasına şikayət verilib.
Avqustun 18-də Bakı Apellyasiya Məhkəməsi şikayəti təmin etməyib. Vəkil Fariz Namazlı Azadliq.info-ya deyib ki, Elgiz Qəhrəman özü məhkəmə prosesində iştirak etməyib. Vəkilin sözlərinə görə, Elgiz Qəhrəman hələ də Daxili İşlər Nazirliyinin Baş Mütəşəkkil Cinayətkarlıqla Mübarizə İdarəsində saxlanır. Vəkilinə NİDA-çı gənclə görüşməyə icazə verilmir.
Elgiz Qəhrəman narkotik vasitələri, psixotrop maddələri, onların prekursorlarını hazırlama, istehsal etmə, əldə etmə, saxlama, daşıma, göndərmə və ya satmada ittiham olunur. Bu ittihamla gənc fəal əmlakı müsadirə olunmaqla 5 ildən 12 ilədək müddətə azadlıqdan məhrumetmə ilə cəzalandırıla bilər.
NİDA Vətəndaş Hərəkatı Elgiz Qəhrəmana qarşı ittihamların əsassız olduğunu, onun siyasi mövqeyinə görə tutulduğunu bəyan edir.
