REAL-çı gənclərə inzibati həbs verilib
Respublikaçı Alternativ (REAL) Hərəkatının gənc üzvləri Elşən Qasımov və Toğrul İsmayılovun hər birinə 7 sutka inzibati həbs cəzası verilib. Məlumatı “Azadlıq” radiosu yayıb.
Məlumata görə, qərar Səbail Rayon Məhkəməsinə çıxarılıb.
Elşən Qasımov və Toğrul İsmayılov avqustun 15-də paytaxtda metronun “İçərişəhər” stansiyası yaxınlığında saxlanılıblar. REAL-ın bəyan etdiyinə görə, gənclər yeni çapdan çıxan təşviqat materiallarını götürməyə gedərkən küçədə tutulublar.
Elşən Qasımov və Toğrul İsmayılov REAL-ın ölkədə sentyabrın 26-da keçiriləcək referendumla bağlı yaratdığı “Respublikaçı Alternativ” təşəbbüs qrupunun səlahiyyətli nümayəndəsidir.
Avqustun 12-də də REAL-in icraçı katibi, iqtisadçı Natiq Cəfərli də tutulub. Həmin gün o, əvvəlcə Baş Prokurorluğun Ağır Cinayətlərə Dair İşlər üzrə İstintaq İdarəsinə çağırılıb. Gecə saatlarında isə Nəsimi Rayon Məhkəməsi onun barəsində 4 ay müddətinə həbs qətimkan tədbiri seçib. Natiq Cəfərlinin yaşadığı mənzildə axtarış aparılıb, sənədlər, kompüterlər, zinət əşyaları götürülüb.
Natiq Cəfərli Cinayət Məcəlləsinin 192-ci (qanunsuz sahibkarlıq) və 308.2 (vəzifə səlahiyyətlərindən sui-istifadə — bu əməllər ağır nəticələrə səbəb olduqda və ya seçkinin (referendumun) nəticələrinə təsir məqsədilə törədildikdə) maddələri ilə ittiham olunur. Natiq Cəfərli də “Respublikaçı Alternativ” təşəbbüs qrupunun səlahiyyətli nümayəndəsidir.
