İİV və QİÇS: Səhiyyə Nazirliyi rəqəmlər açıqlayıb
Səhiyyə Nazirliyinin 3 avqust məlumatına görə, Azərbaycanda İİV infeksiyası — QİÇS pandemiyası əsasən yüksək riskli qruplara aid olan əhali təbəqələri, inyeksion narkotik istifadəçiləri arasında yayılıb. Hesabatda bildirilir ki, 2016-cı ilin 6 ayı ərzində aşkar olunan İİV infeksiyasına yoluxma hallarının 20,3 faizi, 1987-2016-cı illər ərzində aşkar olunan halların isə 49,2 faizi inyeksiya yolu ilə narkotik istifadəsi nəticəsində baş verib.
Hesabat dövründə 283 yoluxma halı aşkar edilib. Onlardan 276-sı (97,5 faizi) Azərbaycan vətəndaşı, 7-si (2,5 faizi) əcnəbidir. Qeydiyyata alınan 276 yerli sakindən 180-i (65,2 faizi) kişi, 96-sı (34,8 faizi) qadındır. QİÇS mərhələsinə 86 nəfər keçib.
6 ay ərzində İİV-ə yoluxması təsdiq olunan Azərbaycan vətəndaşlarının 56-nın (20,3 faiz) parenteral, 160-nın (58 faiz) heteroseksual, 5-nin (1,8 faiz) homoseksual kontakt nəticəsində, 4 nəfərin (1,7 faiz) şaquli yolla, 51 nəfərin (18,5 faiz) yoluxma yolu ilə xəstəliyə tutulduğu müəyyən edilib.
Ümumilikdə 1987-ci ildən 2016-cı ilin iyul ayınadək Respublika QİÇS-lə Mübarizə Mərkəzində İİV infeksiyası təsdiq olunan 4955 nəfər rəsmi qeydiyyata götürülüb. Onlardan 3607-si (73,2 faiz) kişi, 1348-i (26,8 faiz) qadındır. QİÇS mərhələsində olan vətəndaşların sayı isə 1798 nəfərdir.
İİV-lə yaşayanların 47 faizi inyeksion narkotik istifadəsi, 42,1 faizi heteroseksual, 1,8 faizi homoseksual kontakt, 1,8 faizi anadan uşağa keçmə, 0,02 faizi (1 nəfər) donor qanının köçürülməsi nəticəsində infeksiyaya yoluxub, 7,3 faizində yoluxma yolu müəyyən edilməyib.
Səhiyyə Nazirliyinin xətti ilə 2006-cı ildən tətbiq edilən antiretrovirus terapiyaya hazırda 3240 İİV-lə yaşayan şəxs cəlb olunub.
İlin 6 ayı ərzində nikaha daxil olmaq istəyən 69 min 796 şəxs İİV-ə görə müayinə edilib, 44 nəfərdə yoluxma faktı təsdiqlənib.
Səhiyyə Nazirliyi bildirir ki, Azərbaycan İİV infeksiyasına yoluxma səviyyəsi üzrə aşağı olan ölkələr sırasına daxildir.
