Sabiq generala ömürlük həbs cəzası verildi
Çin Hərbi Məhkəməsi iyulun 25-də Mərkəzi Hərbi Şura sədrinin sabiq müavini Qo Bosyuna ömürlük həbs cəzası kəsib. Qo Bosyun yüksək məbləğdə rüşvət almaqda təqsirli bilinib.
Novator.az-ın məlumatına görə, Qo Bosyun bütün siyasi hüquqlarından və general-polkovnik hərbi rütbəsindən məhrum olunub. Onun şəxsi aktivləri, qanunsuz yolla əldə etdiyi bütün pul vəsaitləri müsadirə olunaraq dövlətə verilib.
2015-ci ildə hakim Kommunist Partiyasından uzaqlaşdırılan sabiq general-polkovnikin işini araşdıran hərbi prokurorluq Qo Bosyunun 12,3 milyon dollar rüşvət aldığını müəyyən edib. İttihama görə, Qo Bosyun vəzifə səlahiyyətlərindən sui-istifadə edərək bəzi şəxsləri xidmətdə irəli çəkmək üçün yüksək məbləğdə rüşvət alıb. Qo Bosyunun öz günahını etiraf etdiyi deyilir.
