Qafqaz Universitetini SOCAR-ın yaratdığı mərkəz bağlayıb
Qafqaz Universitetinin bağlanması haqda qərarı Azərbaycan Dövlət Neft Şirkətinin (SOCAR) yaratdığı Azərbaycan Beynəlxalq Təhsil Mərkəzi verib.
Qafqaz Universitetini Azərbaycanda Türkiyənin “Çağ Öyrətim işlətmələri” qrupu açmışdı. Sonradan – 2013-cü ildə universitetin təsisçiliyi Azərbaycan Beynəlxalq Təhsil Mərkəzinə keçib.
Novator.az xəbər verir ki, Azərbaycan Beynəlxalq Təhsil Mərkəzi ictimai birlikdir, onun başqa təsisçiləri də var. Dövlət Neft Şirkəti birliyin əsas təsisçisidir.
Qafqaz Universitetinin bağlanması haqda qərarı təsisçisi iyulun 20-də qəbul edib.
Təhsil Nazirliyi bildirir ki, universitetdə təhsil alan tələbələrin təhsillərinin davam etdirilməsini təmin etmək məqsədilə işçi qrupu yaradılacaq və tələbələrin yerləşdirilməsi prosesi aparılacaq.
Qafqaz Universiteti Azərbaycan Respublikası Xalq Təhsili Nazirliyinin nəzdindəki Dövlət Ali Ekspert Komissiyasının 1 may 1993-cü il qərarı ilə fəaliyyətə başlayıb, Nazirlər Kabinetinin 11 sentyabr 1995-ci il qərarı ilə dövlət qeydiyyatından keçib. 20 avqust 2002-ci ildə Təhsil Nazirliyinin lisenziya verməsi ilə universitetin statusu bir daha rəsmiləşib.
Universitetin rektoru türkiyəli professor Əhməd Saniçdir.
