“Manatın valyuta ehtiyatları hesabına qorunması davam edəcək”
İqtisadçı ekspert Rövşən Ağayev Dövlət Gömrük Komitəsinin açıqladığı, ilin ilk yarısına aid xarici ticarət statistikasına (6 aylıq göstəricilər) münasibət bildirib.
Transparency.az-ın məlumatına görə, ekspert yazır ki, ölkədə iqtisadi fəallığın kəskin azalması, xaricə kapital axınının xeyli səngiməsi, xarici valyuta ticarətinin rəsmi dövriyyəsinin əhəmiyyətli dərəcədə məhdudlaşmasına baxmayaraq xarici ticarətdə 225,7 milyon dollarlıq kəsir xarici valyutaya tələbin təklifi üstələdiyini göstərir: “Ticarət balansında bu səviyyədə kəsir varsa, böyük ehtimalla cari hesablar balansında, həmçinin tədiyyə balansının ümumi saldosunda defisit hələ də qalır. Çünki son 10 ildə Azərbaycanın tədiyyə balansının ümumi kəsiri daima ticarət balansındakı irihəcmli profisit hesabına qapadılıb.
BMT-nin Ticarət və İnkişaf Konfransının statistikası göstərir ki, Azərbaycanda rəsmi idxal faktiki idxaldan xeyli aşağıdır. Yəni ticarət balansının real kəsiri də rəsmi elan ediləndən yüksəkdir. Bütün bunların nəticəsi odur ki, xarici valyutaların manata təzyiqi, rəsmi valyuta ehtiyatlarının əriməsi hesabına məzənnənin qorunması hələ də davam edəcək”.
Transparency.az xatırladır ki, bu il Mərkəzi Bank və Dövlət Neft Fondu milli valyutanın sabitliyi üçün 3 milyard 442,8 milyon dollar satıb.
