Azərbaycanın ən çox mal aldığı ölkə Rusiyadır
Dövlət Gömrük Komitəsi Azərbaycanın xarici ticarət dövriyyəsində əsas ölkələrin siyahısını açıqlayıb. Transparency.az-ın məlumatına görə, 2016-сı ilin ilk 6 ayında Azərbaycanın xarici ticarət dövriyyəsində (Göstəricilər) əsas ölkələr İtaliya və Rusiya olub. İtaliya ilə ticarət dövriyyəsinin həcmi ümumi dövriyyənin 11,96 faizini, Rusiya ilə 11,88 faizini təşkil edib.
Türkiyə 8,71%-lə üçüncü, Almaniya 6,4%-lə dördüncü, Fransa 5,32%-lə beşincidir.
İlin ilk altı ayında Azərbaycanın ixracında ən böyük pay İtaliyaya düşür. Bu ölkəyə ixrac ümumi ixracın 19,91%-dir.
İdxalda əsas ölkələrin siyahısına Rusiya başçılıq edir (18,35%).
Bu ilin yanvar-iyun aylarında MDB ölkələri üzrə ixrac ötən ilin müvafiq dövrü ilə müqayisədə 27,71% artıb. Avropa İttifaqı üzrə ixracda 46,23%, digər ölkələr üzrə ixracda 32,97% azalma olub.
2016-cı ilin ilk 6 ayında MDB ölkələrindən idxal 2015-ci ilin müvafiq dövrü ilə müqayisədə 4,72% azalıb. Avropa İttifaqı ölkələri üzrə idxalda 17,21% azalma var. Digər ölkələrdən idxal isə ötən ilin müvafiq dövrü ilə müqayisədə 16,24% aşağı düşüb.
