Erkən nikahla bağlı tədbir keçirilib
Sumqayıtda Ailə, Qadın və Uşaq Problemləri üzrə Dövlət Komitəsi və şəhər icra hakimiyyətinin birgə təşkilatçılığı ilə “Sağlam həyat naminə erkən nikaha YOX deyək” adlı maarifləndirici tədbir keçirilib.
AZƏRTAC xəbər verir ki, tədbirdə erkən nikahla bağlı film nümayiş olunub. Sumqayıt Şəhər İcra Hakimiyyəti başçısının müavini Lalə Hacıyeva erkən nikahların qarşısını almaq məqsədilə şəhərdə görülən işlərdən danışaraq layihənin əhəmiyyətini qeyd edib. O bildirib ki, aparılan maarifləndirmə işləri nəticəsində erkən nikaha girənlərin sayı əhəmiyyətli dərəcədə azalıb.
Ailə, Qadın və Uşaq Problemləri üzrə Dövlət Komitəsinin sədr müavini Aynur Sofiyeva erkən nikahların ailədə və cəmiyyətdə törətdiyi fəsadları diqqətə çatdıraraq bu halların qarşısının alınmasında cəmiyyətin üzərinə mühüm vəzifə düşdüyünü vurğulayıb.
Digər çıxış edənlər erkən nikahların körpə və ana ölümü hallarının çoxalmasına, boşanma hallarının artmasına, qızların təhsil imkanlarının azalmasına, onların cəmiyyətdən təcrid olunmasına, daha çox fiziki və cinsi zorakılığa məruz qalmasına səbəb olduğunu bildiriblər.
Tədbirdə müzakirə edilən mövzu ilə bağlı müxtəlif təkliflər irəli sürülüb.
