Tacikistanda əmi, dayı, xala, bibi uşaqları və nəvələri arasında nikah rəsmən qadağan olundu
Tacikistanda yaxın qohumlar arasında nikahı qadağan edən qanun qüvvəyə minib. Novator.az xəbər verir ki, Tacikistanın vətəndaşlıq vəziyyəti aktlarının dövlət qeydiyyatı haqda qanuna edilən dəyişikliyə əsasən, bundan sonra ölkədə yaxın qohumlar – xala, bibi, dayı, əmi uşaqları və nəvələri arasında nikah bağlamaq yasaq olunur.
Yeni qanun evlənmək istəyənləri nikahdan əvvəl pulsuz tibbi müayinədən keçməyə və qan verməyə də məcbur edir. Vətəndaşlıq vəziyyəti aktlarının qeydiyyatını aparan orqanlara (VVAQ şöbələrinə) tibbi arayış təqdim etməyən cütlüklərin nikahını qeydə almaq qadağan olunur.
Nikahla bağlı dəyişiklikləri parlamentin aşağı palatasının deputatları 2016-cı ilin yanvarında qəbul ediblər. Həmin vaxt səhiyyə naziri Nusratullah Salimzode demişdi ki, ölkədə 30 mindən çox əlil uşaq var. Nazir həmin uşaqların əksərinin yaxın qohumlar arasında nikahdan doğulduğunu söyləmişdi.
