Böyük Britaniya: hər 8 qadından və hər 10 kişidən biri sonsuzluqdan əziyyət çəkir
Böyük Britaniyada hər 8 qadından və hər 10 kişidən biri sonsuzluqdan əziyyət çəkir. Britaniya alimlərinin “Human Reproduction” jurnalında dərc olunmuş məqaləsində belə deyilir.
Novator.az-ın məlumatına görə, məqalə müəllifləri yazırlar ki, sonsuzluqdan əziyyət çəkənlərin yarısı bunu gizlədir – həm həkimlərdən, həm də qarşı cinsin nümayəndələrindən.
Məqalə müəlliflərindən biri, ginekoloq Cessika Datta bildirir ki, sonsuzluqdan əziyyət çəkən insanların çoxu öz problemini bilsə də, yardım almağa cəhd göstərmir: “Bunun kökündə “dölsüzlük” damğasına tuş gəlməmək və müxtəlif sosial-iqtisadi faktorlar dura bilər”.
Datta və həmkarları məqaləni hazırlayarkən Böyük Britaniyada qadınlı-kişili 15 min adamın şəxsi həyatını araşdırıblar. Onların keçirdiyi sorğular göstərib ki, kişilərin təxminən 10%-i, qadınların isə 13%-i sonsuzluqdan əziyyət çəkir. Belə qadınların əksərinin 35-44, kişilərin isə 35-54 yaş arasında olduğu müəyyənləşib.
Britaniyalı mütəxəssislərin araşdırması onu da göstərib ki, sonsuzluq ölkənin imkansız təbəqəsindən daha çox varlı, sosial-iqtisadi statusu yüksək olan adamlar arasında yayılıb.
