Qənimət Zahidin qohumlarına hökm oxundu
İyunun 28-də Bakı Ağır Cinayətlər Məhkəməsində Rüfət Zahidov və Rövşən Zahidovun cinayət işi üzrə məhkəmə prosesi başa çatıb. “Report”un məlumatına görə, hakim Eldar Mikayılovun sədrliyi ilə keçirilən prosedə hökm oxunub. Rüfət Zahidov və Rövşən Zahidovun hər biri 6 il müddətinə azadlıqdan məhrum edilib.
Hər iki şəxs Cinayət Məcəlləsinin 234.4.1 (qanunsuz olaraq narkotik vasitələri, psixotrop maddələri və ya onların prekursorlarını hazırlama, istehsal etmə, əldə etmə, saxlama, daşıma, göndərmə və ya satma, qabaqcadan əlbir olan bir qrup şəxs tərəfindən və ya mütəşəkkil dəstə tərəfindən törədildikdə) maddəsi ilə təqsirli bilinib.
Prokuror Zahidovların 8 il müddətinə azadlıqdan məhrum edilməsini istəmişdi.
Rüfət Zahidov hazırda Fransada yaşayan “Azadlıq” qəzetinin baş redaktoru Qənimət Zahidin qardaşı oğlu, Rövşən Zahidov isə onun əmisi oğludur.
Müdafiəçiləri hesab edirlər ki, Rüfət və Rövşən Zahidovlar qohumları Qənimət Zahiddən qisas almaq məqsədilə şərlənərək həbs olunublar. “Amnesty İnternational” təşkilatı onları vicdan məhbusu elan edib.
