Vətəndaşlığın itirilməsi qanunu imzalanıb
Prezident İlham Əliyev Mülki Prosessual Məcəlləyə dəyişiklikləri imzalayıb. Yenilik şəxsin Azərbaycan Respublikası vətəndaşlığını itirməsi haqqında işlər üzrə icraatı tənzimləyir.
Dəyişikliyə görə, Dövlət Miqrasiya Xidməti “Azərbaycan Respublikasının vətəndaşlığı haqqında” qanunda nəzərdə tutulmuş hallarda şəxsin vətəndaşlığı itirməsi ilə əlaqədar məhkəməyə müraciət edir. Şəxsin Azərbaycan Respublikası vətəndaşlığını itirməsi ilə əlaqədar ərizədə vətəndaşlığın itirilməsinə əsas olan hallar göstərilməli və ərizəyə əsaslandırılmış rəy və bununla əlaqədar toplanmış sənədlər əlavə edilməlidir.
Məhkəmə ərizəyə təqdim olunduqdan sonra 10 gün müddətində baxır. Ərizəyə baxılması barədə işdə maraqlı olan şəxslərə məlumat verilir, lakin həmin şəxslərin üzrlü səbəb olmadan məhkəmə iclasına gəlməməsi işə baxılmasına mane olmur. Ərizəyə baxılmasında vətəndaşlığın itirilməsi halları ilə bağlı araşdırmanı aparmış dövlət orqanının nümayəndəsinin iştirakı məcburidir.
İşə mahiyyəti üzrə baxan hakim “Azərbaycan Respublikasının vətəndaşlığı haqqında” qanunda göstərilən məhdudiyyətlər nəzərə alınmaqla ərizənin rədd edilməsi və ya təmin edilməsi barədə qətnamə qəbul edir.
Transparency.az bildirir ki, “Azərbaycan Respublikasının vətəndaşlığı haqqında” qanuna görə, Azərbaycan Respublikasının vətəndaşlığından çıxmaq barəsində vəsatət qaldıran şəxsin dövlət qarşısında icra edilməmiş öhdəlikləri və ya Azərbaycan Respublikasında hüquqi və fiziki şəxslərin mənafeləri ilə bağlı olan əmlak öhdəlikləri varsa, vətəndaşlıqdan çıxmaq haqqında vəsatəti rədd edilə bilər.
Azərbaycan Respublikasının vətəndaşlığından çıxmaq barəsində vəsatət qaldıran şəxs cinayət işi üzrə təqsirləndirilən şəxs qismində cəlb edilmişsə, yaxud onun barəsində qanuni qüvvəyə minmiş və icra edilməli olan məhkəmə hökmü varsa və ya şəxsin Azərbaycan Respublikası vətəndaşlığından çıxması Azərbaycan Respublikasının dövlət təhlükəsizliyi mənafelərinə ziddirsə, həmin hallar aradan qalxana qədər vətəndaşlıqdan çıxmağa yol verilmir.
