Roma papası: “Öldürmə” ehkamı cinayətkara da aiddir”
Roma papası I Fransisk beynəlxalq ictimaiyyəti ölüm hökmünün qadağasına yeni stimul verməyə çağırıb. Novator.az xəbər verir ki, papa Norveçin paytaxtı Osloda keçirilən ölüm hökmünə qarşı 6-cı ümumdünya konqresinə video müraciət göndərib.
Müraciətdə qeyd olunur ki, dünyanın 140 ölkəsi faktiki və ya qanunvericilik səviyyəsində ölüm hökmündən imtina edib: “İstənilən cinayətə münasibətdə ölüm cəzası yolverilməzdir. Cinayətkarın qətlinin ədalətə heç bir aidiyyəti yoxdur. Əslində məhkuma amansızlıqla yanaşır və ona bir daha şans vermirlər.
Törədilən cinayətin ağırlığından asılı olmayaraq indiki zamanda ölüm hökmü qəbuledilməzdir. Bu, həyat toxunulmazlığına və insan ləyaqətinə qəsd etmək deməkdir. Bu, Allahın insana və cəmiyyətə qarşı mərhəmətinə ziddir. “Öldürmə” ehkamı təkcə günahsıza deyil, cinayətkara da aiddir”.
Roma papası müraciətində hamını təkcə ölüm hökmünün ləğvi istiqamətində iş aparmağa deyil, həm də həbsxana şəraitini yaxşılaşdırmağa, azadlıqdan məhrum olan şəxslərin ləyaqətinə hörmət etməyə çağırıb.
