Dövlət qulluqçuları ilə bağlı statistika açıqlanıb
23 iyun Azərbaycanda dövlət qulluqçularının peşə bayramı kimi qeyd olunur. Transparency.az xəbər verir ki, Dövlət Statistika Komitəsi dövlət qulluqçuları ilə bağlı bilgilər yayıb. Açıqlamaya görə, 2016-cı il yanvarın 1-nə ölkədə dövlət qulluqçularının sayı 30,1 min nəfər olub, onların 29,2 faizini qadınlar təşkil edib.
Dövlət qulluqçularının 3,9 faizi inzibati vəzifələrin ali-3-cü təsnifatları, 75,4 faizi 4-7-ci təsnifatları üzrə, 20,7 faizi dövlət qulluğunun yardımçı vəzifələrində işləyib.
Hesabata əsasən, dövlət qulluqçularının 7,3 faizi 1 ilə qədər, 27,9 faizi 1 ildən 5 ilə qədər, 21,6 faizi 5 ildən 10 ilə qədər, 16,3 faizi 10 ildən 15 ilə qədər, 26,9 faizi isə 15 il və daha çox qulluq stajına malikdir.
Dövlət qulluqçularının yaş qrupları üzrə bölgüsü belə xarakterizə olunur: 30 yaşa qədər olanlar 17,9 faiz, 30-34 yaşda 15 faiz, 35-44 yaşda 21,8 faiz, 45-54 yaşda 24,3 faiz, 55-62 yaşda 17,5 faiz, 63-64 yaşda 2,3 faiz, 65 və yuxarı yaşda 1,2 faiz.
Ölkədə 4-7-ci təsnifatlar üzrə inzibati vəzifələrdə çalışan dövlət qulluqçularının 1,1 faizini yerli icra başçısının müavinləri, 14,9 faizini şöbə müdirləri, 11,2 faizini şöbə müdirinin müavinləri, 8,5 faizini sektor müdirləri, 26,6 faizini baş məsləhətçilər, 4,8 faizini böyük məsləhətçilər, 12,5 faizini aparıcı məsləhətçilər, 20,4 faizini məsləhətçilər təşkil edib.
Dövlət qulluğunun ştat cədvəli üzrə vəzifələri 90,7 faiz komplektləşdirilib.
2015-ci ildə dövlət qulluqçularının orta aylıq əməkhaqqı 611,9 manat olub.
Dövlət qulluqçularının peşə bayramı prezident İlham Əliyevin 25 may 2006-cı il sərəncamı ilə təsis edilib.
