Ərzaq təhlükəsizliyi: Azərbaycan 113 ölkə arasında 57-cidir
2016-cı il üzrə Qlobal Ərzaq Təhlükəsizliyi İndeksi açıqlanıb. Azadliq.org-un məlumatına görə, “The Economist İntelligence Unit” təşkilatının yaydığı hesabat 113 ölkədə ərzağa çatım, onun mümkünlüyü və keyfiyyəti kimi meyarlara əsaslanır.
Ərzaq Təhlükəsizliyi İndeksi üzrə maksimum bal 100-dür. Transparency.az bildirir ki, Azərbaycan 57,1 balla 113 ölkə arasında 57-ci pillədə durur. Vyetnam və Misir də eyni qədər bal toplayıb.
Qonşulardan Türkiyə 45-ci, Rusiya 48-ci yerdədir.
Keçmiş SSRİ məkanı ölkələrindən Belarus 46-cı, Ukrayna 63-cü, Özbəkistan 72-ci pilləni tutur.
Ərzaq təhlükəsizliyi baxımından ən yaxşı 10 ölkə hesabatda belə sıralanır: ABŞ, İrlandiya, Sinqapur, Avstraliya və Niderland, Fransa və Almaniya, Kanada və Böyük Britaniya, İsveç.
Siyahını Mozambik, Niger, Çad, Syerra-Leone və Burundi qapayır.
İndeksə görə, dünyada ərzaq təhlükəsizliyi yaxşılaşır, aclıq səviyyəsi azalır. BMT-nin Ərzaq və Kənd Təsərrüfatı Təşkilatının hesablamalarına əsasən, son 10 ildə pis qidalanan əhalinin sayı 176 milyon nəfər düşüb. Ancaq 800 milyon nəfər, yəni hər 9 nəfərdən 1-i acdır və ərzaq təhlükəsizliyi qlobal problem olaraq qalır.
