Qazaxıstanın Prezident Administrasiyasına yeni rəhbər təyin edildi
İyunun 21-də Qazaxıstan prezidenti Nursultan Nazarbayev Prezident Administrasiyasının rəhbəri, investisiyalar və inkişaf naziri və paytaxt meri postlarına yeni təyinatlar edib.
Novator.az-ın məlumatına görə, Qazaxıstan prezidenti Adilbek Caksıbekovu paytaxt Astananın meri postundan azad edərək Prezident Administrasiyasının rəhbəri təyin edib.
Astananın meri postunu isə 21 iyun təyinatınadək investisiyalar və inkişaf naziri vəzifəsində çalışmış Aset İsekeşev tutub.
İnvestisiyalar və inkişaf naziri postuna nazirin birinci müavini Jenis Kasımbek təyin olunub.
Qazaxıstanın Prezident Administrasiyasının əvvəlki rəhbəri Nurlan Niqmatulin olub. O, administrasiya rəhbəri vəzifəsini ölkə parlamentinə deputat seçildiyinə görə tərk edib. Prezident Nursultan Nazarbayev Nurlan Niqmatulinin namizədliyini parlamentin aşağı palatasının sədri vəzifəsinə irəli sürüb. Parlament dövlət başçısının bu təqdimatına iyunun 22-də baxacaq.
