Xəbərlər yüklənir ...
İyunun 21-də prezident İlham Əliyev Sabunçu rayonu ərazisində əsaslı şəkildə yenidən qurulan Maştağa-Bilgəh yolunun, həmçinin Nardaran qəsəbəsində Abşeron və Nəsrulla Əsgərov küçələrinin açılışında iştirak edib.
Daha sonra dövlət başçısı Nardaran qəsəbəsindəki “Rəhimə Xanım” məscid-ziyarətgah kompleksi ilə tanış olub.
AZƏRTAC xəbər verir ki, prezident İlham Əliyev Nardaran qəsəbəsində sakinlərlə də görüşüb və görüşdə çıxış edib. Qəsəbədə və ətraf ərazilərdə yolların yenidən qurulmasından danışan dövlət başçısı Bakı qəsəbələrinin, o cümlədən Nardaranın sosial-iqtisadi inkişafı ilə bağlı tədbirlərin bundan sonra da davam etdiriləcəyini deyib, yeni iş yerlərinin açılmasının vacibliyini vurğulayıb.
İlham Əliyev bildirib ki, Nardaran qəsəbəsinin sakinləri daim dövlətçiliyə sadiq olublar. Dövlət başçısı ölkədə bütün azadlıqların, o cümlədən din azadlığının tam təmin edildiyini söyləyib, bu sahədə Azərbaycanın əldə etdiyi nailiyyətləri beynəlxalq təşkilatların da yüksək qiymətləndirdiyini qeyd edib. Prezident İlham Əliyev vurğulayıb ki, Nardaran qəsəbəsinin sakinləri də ölkənin müstəqilliyinin möhkəmləndirilməsi işinə töhfə verirlər.