Alternativ xidmətdən boyun qaçıranları cəza gözləyir
Belarusda alternativ hərbi xidmətdən boyun qaçıran şəxsləri cəza gözləyir. Novator.az-ın məlumatına görə, Belarusun əmək və sosial müdafiə nazirinin müavini İqor Starovoytov iyunun 21-də belə deyib.
İyulun 1-dən Belarusda “Alternativ xidmət haqda” qanun qüvvəyə minir. Alternativ xidmət silahlı qüvvələrdə həqiqi xidmət keçmək imkanı olan, amma dini baxışlarına görə bunu istəməyən vətəndaşlar üçün ödənişli ictimai faydalı fəaliyyəti nəzərdə tutur.
Qanunun əsas tələblərinə nəzarəti Əmək və Sosial Müdafiə Nazirliliyi həyata keçirir.
Starovoytov deyib ki, vətəndaş üzrsüz səbəbdən alternativ xidmət keçdiyi yerə gəlmədikdə, həmçinin saxta sənəd təqdim etməklə və ya digər bəhanələrlə xidmətdən boyun qaçırdıqda ona ciddi cəza veriləcək: “Belə yayınmalar bir aydan artıq olarsa, vətəndaşa 5 ilə qədər həbs və ya 5 il müddətinə azadlığının məhdudlaşdırılması cəzalarının verilməsi nəzərdə tutulur”.
Bundan əvvəl müdafiə naziri Andrey Ravkov jurnalistlərə bildirmişdi ki, Belarusda alternativ xidmət keçməyə hələ ki, 20 nəfər razılıq verib.
