113 adamdan 1-i qaçqındır
2011-ci ildən bəri dünyada qaçqınların sayı 22,8 milyon nəfər artıb. BMT-nin Qaçqınlar üzrə Ali Komissarlığının hesabatına görə, 2015-ci ildə dünyada qaçqın, məcburi köçkün və sığınacaq axtaran insanların sayı 65,3 milyon nəfər olub. AZƏRTAC bildirir ki, 2011-ci ildə BMT dünyada qaçqınların sayını 42,5 milyon nəfər göstərib.
Yeni hesabatda bildirilir ki, planetdə hər 113-cü insan qaçqınlıq həyatı yaşamağa məcburdur. Son bir il ərzində qaçqınların sayı 12,4 milyon çoxalıb. Yeni qaçqın kütləsinin yarıdan çoxu üç ölkənin payına düşür: Suriya (4,9 milyon nəfər), Əfqanıstan (2,7 milyon nəfər) və Somali (1,1 milyon nəfər).
Türkiyə ən çox qaçqın qəbul edən ölkələr siyahısında ilk yerdə durur. Bu ölkəyə pənah gətirən qaçqınların sayı 2,5 milyondan artıqdır.
