Albinosların müdafiəsi üzrə forum
Dar əs-Salam şəhərində (Tanzaniya) albinizm xəstəliyi olan insanların müdafiəsi üzrə regional forum keçirilir. Tanzaniyadakı görüş BMT-nin himayəsi ilə keçirilir və əhatə etdiyi mövzu baxımından ilk forumdur.
AZƏRTAC BMT-nin xəbərlər mərkəzinə istinadla xəbər verir ki, iyunun 19-dək davam edəcək forum Afrika qitəsinin 28 ölkəsindən 150 nümayəndəni bir araya gətirir. Nümayəndələrin yarısı müxtəlif qeyri-hökumət təşkilatlarını, iştirakçıların təxminən 20 faizi dövlət strukturlarını təmsil edir. Görüşdə həmçinin hüquq müdafiə təşkilatlarının nümayəndələri və beynəlxalq, o cümlədən BMT-dən ekspertlər iştirak edir.
Forumun əsas vəzifəsi albinosların müdafiəsində təcrübə mübadiləsi aparılması və effektiv tədbirlərin işlənib hazırlanmasıdır.
BMT-də ümid edirlər ki, forum iştirakçıları albinosların müdafiəsində konkret təsirli tədbirləri müəyyənləşdirməyə nail ola biləcəklər.
