Avropa Məhkəməsi Azərbaycandan 12 nəfərin şikayəti üzrə qərarını elan edib
İyunun 16-da Avropa İnsan Hüquqları Məhkəməsi Azərbaycana qarşı 13 şikayət üzrə qərarlarını elan edib.
Şikayətlərin hamısı 2010-cu ildə Azərbaycanda keçirilmiş parlament seçkisi ilə bağlıdır.
13 şikayəti 12 şikayətçi edib. Şikayətçilərdən birinin – Əhəd Məmmədlinin iki şikayətinə baxılıb və onun iki şikayəti üzrə bir qərar çıxarılıb. Əhəd Məmmədlinin vəkili Əsabəli Mustafayevin Facebook şəbəkəsində verdiyi məlumata görə, Avropa Məhkəməsi azadlıq hüququ, ədalətli araşdırma hüququ və sərbəst toplaşma azadlığı hüququ üzrə pozuntuların olduğunu tanıyıb. Məhkəmə Azərbaycan hökumətinin Əhəd Məmmədliyə ümumilikdə 13150 avro məbləğində təzminat verməsi barədə qərar çıxarıb.
Digər şikayətçilər bu şəxslərdir: Qaya Əliyev, Şakir Məmmədov, Fuad Əliyev, Əmrulla Dadaşzadə, Xaliq Hacıyev, Ziyafət Hüseynli, Akif Cavadov, Səxavət Soltanov, Elnur Məcidli, Arzuman Məcidli, İntiqam Əliyev. İntiqam Əliyev həm də adıçəkilən digər şəxslərə Avropa Məhkəməsinə şikayətləri zamanı vəkillik edib. Avropa Məhkəməsi öz qərarlarında onların azad seçki hüququnun pozulduğunu tanıyıb və adıçəkilən 11 nəfərin hər birinə 11000-12000 avro həcmində təzminat ödənməsi barədə qərar qəbul edib.
